Ka noho whakahīhī mātou ki te mahi mō Te Tari Taake, ki te āwhina i ngā tāngata o Aotearoa ia rā ia rā
I taku tīmatanga hei Kaikōmihana mō Te Tari Taake, i te marama o Hūrae 2022, ka riro māku tētahi whakahaere whanaungatanga kanorau, e whai wāhi nui ana ki te tautoko i te oranga pūtea me te oranga pāpori hoki mō ngā tāngata o Aotearoa ia rā ia rā.
I tōku wā poto nei ki Te Tari Taake, e mārama ana te hiahia me te pono o ngā kaimahi ki tā rātou kaupapa nui.
I au e kōrero ana ki ō tātou tāngata whaipānga o waho me ngā hoa mahi o waho, he rongo pai kua whai hua kē ngā tāngata, ngā pakihi me ngā whakahaere o te hapori taake nā te hurihanga nui o Te Tari Taake, tae noa atu ki ngā hoa mahi tahi puta noa i te kāwanatanga me tāwāhi.
Kua kite ā-kanohi hoki ahau i te ū o Te Tari Taake ki tōna wāhi hononga Māori-Karauna e pai ake ai hoki ōna ratonga ki ngā kiritaki Māori. Mā te tautoko i ō mātou kaimahi kia mārama ake ki te ao Māori me te reo Māori, me te mahi pai ake mō te kiritaki Māori, e whakapono ana ahau kei te huarahi kotahi tātou e haere ana.
Kei tēnei Pūrongo ā-Tau ngā whakatutukinga mahi nui a Te Tari Taake huri noa i te tekau mā rua marama kua taha ake nei.
I roto i te tau kua taha ake nei kua oti te hōtaka pakihi hurihanga nui o Te Tari Taake e hia tau te roa, kua tautoko hoki i te urupare a te Kāwanatanga ki te KOWHEORI-19. Kua pā hoki te KOWHEORI-19 ki ētahi o ō mātou kaimahi, ka whakatā ai rātou kia piki anō ai te ora, ki te tautoko rānei i ō rātou whanaunga i pāngia.
He wā uaua tēnei ki ō mātou tāngata me ō mātou kiritaki, inā ia nui ake te mahi pā mai nā te KOWHEORI-19 i ētahi wā.
Nō te 30 o Hune 2022 ka kati ōkawa ai te hōtaka hurihanga pakihi kua tutuki hoki i te wā tika i raro iho i te utu whakapae. Nā te hurihanga nui kua māmā ake ināianei mā te tangata e utu tika, mā te tangata anō hoki e toro ngā ratonga ipurangi. Kua pakari ake tō mātou pūnaha kua tere ake hoki te huri i ngā kaupapahere. Kei te ara tika hoki Te Tari Taake kia iti ake te whakapaunga moni whakahaere ia tau mā te $100 miriona tāra.
Ka mihi atu hoki ahau ki te Kaikōmihana o mua Naomi Ferguson mō ana mahi nui me tana māia ki te ārahi i Te Tari Taake mō te tekau tau kua taha ake nei me te hurihanga nui i ngā whakahaere. Kua whakatōkia te māra hei whakawhanake mā mātou mō ngā tau e tū mai nei.
Ki te titiro whakamua, he wā hari koa tēnei mō mātou ki te whakamahi i ō mātou pūkenga hou ki ngā taonga hou, ngā pūnaha, ngā raraunga me ngā tātaritanga, e whai hua ai mō ngā tāngata katoa o Aotearoa. He nui hoki te hōtaka mahi kāwanatanga hei whakatutuki, me tā mātou tautoko tonu hoki i te urupare KOWHEORI-19 a te kāwanatanga.
Kei te koa ahau ki te ārahi i Te Tari Taake ki tua mai nei o te hurihanga pakihi nui. Kei te ū tonu mātou kia māmā ake te utu taake me ngā utunga pāpori, kia whai wāhi ai te katoa ki te whakapai ake i Aotearoa hei kāinga pai rawa mō te noho me te whai mahi.